Landic Property hefur undirritað samning við NBI, Nýja Kaupþing, Íslandsbanka og Glitni um fjárhagslega endurskipulagningu innlends fasteignasafns síns. Samningurinn styrkir rekstur innlendra dótturfélaga Landic Property, en fasteignarekstur Landic Property á Íslandi gengur vel og er samkvæmt áætlun. Fasteignasafn félagsins samanstendur af 120 fasteignum, samtals meira en 400 þúsund fermetrum af góðu verslunar- og skrifstofuhúsnæði á kjörsvæðum, einkum miðsvæðis í Reykjavík. Meðal eigna félagsins eru Kringlan og Hilton Reykjavík Nordica. Síðastliðna mánuði hefur verið unnið að fjárhagslegri endurskipulagningu móðurfélagsins, Landic Property hf, og sölu á erlendum fasteignasöfnum félagsins og er sú vinna enn í gangi. En félagið mun í framtíðinni einbeita sér að rekstri fasteigna á Íslandi. Félagið er að ganga frá sölu á Magasin og Illum fasteignunum og unnið er að sölu á danska fasteignasafninu Atlas I. Viðar Þorkelsson, forstjóri Landic Property: „Samningurinn við íslensku bankana styrkir íslenska fasteignafélagið til frambúðar og festir það í sessi sem traust fasteignafélag á Íslandi. Samstarfið við þá hefur verið mjög gott og sameiginleg aðkoma þeirra verið lykilatriði í því að verja innlendar eignir félagsins. Um leið sýnir þetta að bankarnir geta unnið saman úr flóknum úrlausnarefnum í því erfiða efnahagsástandi sem nú ríkir.“ Frekari upplýsingar veitir: Viðar Þorkelsson forstjóri Landic Property hf. Sími 575 9000 E-mail: vth@landicproperty.com