Kaupþing Singer & Friedlander hyggst hætta starfsemi á sviði eignafjármögnunar (e. Asset Finance) og hrávöruviðskiptafjármögnunar (e. Commodity Trade Finance) auk þess sem gerðar hafa verið skipulagsbreytingar innan fyrirtækjasviðsins í Bretlandi. Þessar breytingar eru síðasti liðurinn í endurskipulagningu rekstrarins í Bretlandi í kjölfar kaupa Kaupþings á Singer & Friedlander árið 2005. Í kjölfar þessarar endurskipulagningar mun Kaupthing Singer & Friedlander eingöngu leggja áherslu á að veita heildstæða fjármálaþjónustu til lítilla og meðalstórra fyrirtækja og fjársterkra einstaklinga í gegnum fimm kjarnasvið bankans; fyrirtækjasvið, fyrirtækjaráðgjöf, fjárstýringu, markaðsviðskipti og eignastýringu & einkabankaþjónstu. Eignafjármögnun (fyrirtækjaeignafjármögnun, eignafjármögnun á sviði heilbrigðisþjónustu og tryggingaiðgjaldafjármögnun) og hrávöruviðskiptafjármögnun teljast ekki til kjarnastarfsemi hjá Kaupthing Singer & Friedlander og eru að mestu leyti reknar óháðar öðrum deildum. Þessar breytingar koma til með að hafa jákvæð áhrif á kostnaðarhlið bankans og losa um lausafé sem nemur rúmlega 1 milljarði punda (130 milljörðum króna) á árinu 2008. Það fjármagn sem losnar verður nýtt til að efla kjarnastarfsemina í Bretlandi enn frekar. Eftir að þessar breytingar verða um garð gengnar er starfsemi Kaupþings-samstæðunnar á sviði eignafjármögnunar óveruleg. Þar að auki hefur Kaupthing Singer & Friedlander flutt þá deild sem fæst við sérhæfð lánaviðskipti (e. Structured Finance) frá fyrirtækjasviði yfir í þá deild fyrirtækjaráðgjafar sem fæst við skuldsettar yfirtökur (e. acquisition and leveraged finance). Kaupthing Singer & Friedlander mun einnig loka þeim deildum sem sinna fasteigna- og fyrirtækjalánum (e. Property and Corporate Banking) í Leeds og Manchester og flytja þær til Birmingham og Lundúna. Ármann Þorvaldsson, forstjóri Kaupthing Singer & Friedlander "Þessar breytingar marka lokaskrefin í endurskipulagningunni sem hófst í kjölfar yfirtöku okkar á Singer & Friedlander. Við ætlum nú að beina kröftum okkar og fjármagni að kjarnastarfseminni í Bretlandi. Ég vil þakka stjórnendum og starfsfólki þeirra sviða sem við erum nú að segja skilið við fyrir þátt þeirra í velgengninni sem við höfum notið í starfseminni í Bretlandi." Frekari upplýsingar veitir: Jónas Sigurgeirsson, framkvæmdastjóri Samskiptasviðs í síma 444 6112